[कवी अनिलांच्या 'बाई या पावसानं '
कवितेवर आधारित .... ]
____________________
* या सोशल मिडीयानं.....*
____________________
या सोशल मिडीयानं
उडविली फार धूम,
घरातलं बंद झालं
परस्पर संभाषण .
या सोशल मिडीयानं ...
दिसभर देई ठाण ,
रात्रीही ना सोडे मान
नवनव्या पोस्टस् ची
हा करी पखरण .
या सोशल मिडीयानं ...
बोलघेवडयांना भावे,
अबोलांस ही आवडे
उरवी हा देह येथे
नेई मना सिंधुपार !
या सोशल मिडीयानं ...
चिवचिव विचारांची
कधी राळ प्रचाराची
पसरवी अफवांना
कधी ' फॉर्वर्डस् ' मधून
या सोशल मिडीयानं ...
व्हायरल पोस्टस् होती
कॉपी पेस्ट सर्वां हाती
प्रतिभेची होई क्षिती
भावनांना पडे बेडी नानाविध ' इमोजी ' त
या सोशल मिडीयानं ...
याने कामे फार होती
व्यापाराला मिळे गती
करी सेवा समाजाची
देई क्षणार्धात ख्याती
या सोशल मिडीयानं ...
याच्या गुणा नाही तोटा,
नाही दोषांनाही पार
नाही 'तो ' तर खोळंबा,
असे तर अडचण !
या सोशल मिडीयानं ...
No comments:
Post a Comment